UNSC member te'n Myanmar chungchangah inremna siam thei lo

UN Security Council chuan Myanmar sipai sorkarin an ramchhung buaina chingfel a, boruak muanawm a awmna tura hma la tura nawrna tur thuchhuah siam chungchangah thuchhuah a siam thei lo.

Kar liam ta Zirtawpni khan UNSC hian closed-door meeting a nei a, Myanmar chungchangah China leh United Kingdom-te thuchhuah chu an ngaihtuah ho a, mahse member-te an inrem thei lo. Hei vang hian inremna an siam theih loh chungchangah China leh UK hi an inpuh tawn zui nghal a ni.

Council meeting-ah hian Myanmar-a ASEAN palai, Cambodia deputy prime minister leh foreign minister Sokhonn Park leh UN palai Noeleen Heyzer-te chuan Myanmar ram dinhmunte an sawi.

Kum 2021 October thlaa palai atana ruat, Heyzer hian Myanmar-a zin phalna a hmu tawh a, mahse a thlen dan tur chungchanga thu pawimawh leh a mi hmuh turte erawh hrilh hriat a la ni lo.

UN chuan Myanmar-a sipai sorkar hotute chauh ni lo, Myanmar-a party dang aiawhte pawh a hmuh theih an beisei thu an sawi.