IS hotu-in Iraq-ah an chak lo tih pawm

Islamic State (IS) firfiak pawl hotu, Abu Bakr al-Baghdadi chuan Iraq sipaiten nena an inbeih meknaah an pawl chu an chak lo tih a pawm.

Al-Baghdadi hian inthlahna thuchah a sawiah, an pawl-a Arab mi ni lo awmte chu an ram lamah kir turin a chah a, an kir lo a nih pawhin thihchilh bomb hmanga intihlum turin a chah. IS hotu-in inthlahna thuchah a sawi hi ziakin IS puithiam leh sakhaw hruaitu dangte hnenah Thawhlehni khan thawn darh a ni tih, Iraq TV network Alsumaria chuan a tarlang.

Iraq sipaite chuan an ram khawpui pawimawh, Mosul khua chu IS firfiakte kut aṭanga lak let tumin beihpui an thlak chhunzawm zel a, khawpui chhung hmun tam zawk chu sipaite thuneihna hnuaiah a awm tawh nia sawi a ni.

IS hotupa hian sipaite beihpui thlaknaah ṭum eng emaw zat hliam pawh a tuar tawh nia sawi a ni a, a lu manah hian US dollar maktaduai 10 phal mek a ni bawk. Hetihlai hian Mosul khuaah hian a la awm em tih hriatchian a ni lo. Iraq sipaiten beihpui an thlak hnu hian IS firfiak tam tak chu Syria ramah an tlanchhe tawh a ni.

Islamic State firfiakte hi Iraq ramah an dinhmun chhe sawt viau mah se, Afghanistan-Pakistan ramri lamah huang an zauh nia sawi a ni. Afghanistan official-te chuan firfiakte hian an pawl mi leh sa turte an la thar niin an sawi.

Tun hnaiah Pakistan-a Sufi shrine beihnaah khan IS hi a mawhphurhtu nia puh an ni a, he pawikhawihna thlengah hian mi 90 an thi a ni. Hei bakah hian IS hian Afghanistan hmarlama chhawmdawl hna thawktute beiin, mi paruk an that bawk.