US House panel-in Trump-Russia chhui dawn

US House of Representatives intelligence committee chuan Donald Trump-a presidential campaign leh Russia-in inzawmna an nei nia puhna chu a chhui chiang dawn.

Democratic Representative Adam Schiff chuan Trump-a campaign laia Russia inrawlh nia sawi chung­chang chhui tur hian committee chuan a remti tih a sawi. US intellingence report ṭhenkhat chuan Russia hian US President thlannaah Donald Trump a chak theihna turin a pui niin an sawi. Trump a chak theih nan hian a khingpui, Democratic president candidate Hillary Clinton-i leh a party-te chu an bei na hle niin an sawi bawk.

Donald Trump chuan nikum November thlaa President thlan dawn khan a thawhpui leh Russia chuan inbiakna leh thawhhona engmah an nei lo tih a sawi a, Russia-in a pui nia sawi chu media mi ṭhenkhatten an thehdarh niin a sawi.

Trump hian president a nih hnua a ṭum khatna turin Thawhlehni zan khan Congress joint session-ah thu a sawi a, he hunah hian khawvel aiawhtu ni loin, America ram aiawhtu a nih thu a sawi a, America ram mipuite ṭhatna chu a dah pawimawh ber tur thu a sawi. Hemi rual hian ram dangte chu an zah hle tih sawiin, ram tinin an duh­thlanna kawng an zawh tura dikna an neihte chu America chuan a zahsak thu a sawi. America chuan ṭhian thar neih te, thawhdunna thar siamte a duh a, boruak ṭha leh muanna an duh a, indona leh tualchhung buaina thlentir chu a duh lo tih a sawi. America leh a ropuina te chu midangten an laksak a remti dawn lo a, America-a company leh hnathawktu ropui tak takte chu midangin an hlawkna tura an chhawr ṭangkai a remti dawn lo tih sawiin, an ram ngeiah hna tam zawk lak kir leh a tiam.