Hosni Mubarak-a thiam chantir

Egypt appeal court, Court of Cassation chuan an ram president hlui, Hosni Mubarak-a chu kum 2011-a nawrh huaihawt­te thatnaa mawhphurtua puhna thubuaiah thiam a chan tir.

Hosni Mubarak-a hi thubuai pahnih siamsak a ni a, kum 2011 January thlaa sorkar laka lungawi loa nawrh huaihawtte kutthlak leh thahnaa mawhphurtua puhna leh, eiruk thubuai a nei a ni.

Kum 2012 khan nawrh huaihawt zinga ṭhenkhatte thah an nih chungchangah Mubarak-a hi thiam loh chantir­in damchhung tang tura hrem a ni a, mahse court thutluka hi ngaihtuah nawn tura a ngen hnuah, nimin khan appeal court chuan thiam a chantir leh ta a ni. Hemi hma hian interior minister hlui, Habib al-Adly pawh thiam chantir a lo ni tawh bawk.

Sorkar laka lung­awi lohna lantira nawrh huaihawtna tel ṭhalai hruai­tu zinga a tam zawk chu thiam loh chantirin jail-ah tantir an ni a, activist 60,000 vel chu an la tang mek a ni.

Mubarak-a hi kum 88 a ni tawh a, kum 2011-a man a nih aṭang khan a hun tam zawk chu sipai hospital-ah a hmang a ni. Ningai-a a thubuai ngaihtuahnaah pawh court-ah zawn luh a ngai a ni.