Syria sipaiten IS kut aṭangin Palmyra la let

Syria sipaite chuan an ram khawpui pawimawh, Palmyra chu a ṭum hnihna atan Islamic State (IS) firfiakte kut aṭangin an la let leh niin an sawi.

Palmyra hi khawpui hlui pawimawh tak a ni a, he khawpui hi nikum December thla khan a vawi hnihna atan IS firfiakte hian sipaite kut aṭangin an la a ni. Syria sipaite hian ṭangrual sipai leh Russia sipaite puihna hmangin firfiakte kut aṭang hian an la let leh thei ta a ni.

Ningani khan Syria sipai leh an mahni puitu Iran helpawlte chuan Palmyra khaw chung hi an lut tawh a, IS firfiakte pawh an inthiarfihlim vek tawh niin, Syrian Observatory for Human Rights chuan a sawi. Firfiakte hi Palmyra aṭanga khawchhak lamah an insaseng a ni.

IS firfiakte hian nikum March thla thleng khan Palmyra khua hi an luah a, Syria sipaiten khawpui hi la letin thla riat ral hnu, nikum December thla khan sipaite kut aṭang hian an laksak leh a ni. Khawpui chhunga hmanlai thil hlu leh ngaihhlut thil tam tak an tichhia a ni.

United Nations-a Syria ambassador, Bashr al-Jaafari chuan Palmyra khua laklet a nih thu hi a sawichiang tawh bawk a, Syria President Bashar al-Assad chuan a lo tiam tawh angin firfiakte kut aṭangin an ram khawpui pawimawh tak chu a lo la let leh ta niin a sawi. Mahse firfiakte hian khawpui aṭanga an tlanchhiat hma hian hmun tam takah chilpuah bomb an phum niin a sawi.