Ukraine President Zelenskyy-a'n Kharkiv-a sipaite a tlawh

Ukraine president Volodymyr Zelenskyy chuan Pathianni khan an ram khawchhak lam, Kharkiv region-a an sipaite a tlawh. February 24-a Russia-in a run hnua an ram khawpui, Kyiv bial chhuahsana official-a a zinchhuah lehna hmasa ber a ni.

Kharkiv khawpuiah Russia sipaiten an thil kahchhiat a en kual a, bullet-proof vest ha chungin sipaite hmaah thu sawiin, "In hnathawhna avangin mimal tin chungah lawmthu ka sawi duh a ni," a ti. Hemi hnu lawkah, an khawpuia venhim hna a thawh ṭhat tawk loh avangin Kharkiv region-a tualchhung security chief Roman Dudin chu a ban tih a puang zui nghal bawk.

Russia chuan eng emaw chen thawm lian tham an neih loh hnuah, Ukraine khawpui lian ber dawttu, Kharkiv-ah beihpui an thlak chhunzawm leh tawh a ni.

April leh May thla khan Russia sipaite hi an nawr let a, hei vang hian Kharkiv aṭanga tlanchhiate pawh an kir leh a, metro-te pawh Russia-in an ram a run hnuah a vawi khatna hawn leh a ni bawk.

Mahse he khawpui kap phak hian Russia sipaite an la awm reng a, President Zelenskyy-a'n a tlawh hnu lawkah hian bomb puak rite hriat tur a awm zui a ni.

President Zelenskyy office chuan," Kharkiv leh region-a building 2,229-te chu tihchhiat an ni tawh. Mahse hengte hi kan siamṭhain kan tunding ṭha leh vek dawn a ni," a ti.