Taiwan Parliament-ah member-te intibuai

Taiwan-a Parliament-ah nimin khan President hlui Chen Shui-bian-a eiruk thubuai nawtreh theihna tur bill siam chungchangah member-te an intibuai.

Eptu pawl Kuomintang (KMT)-a legislator tam zawkte chuan bill chhiarchhuah tur hi duh loin, chhinchhiahna leh aurinna nen legislative chamber-a podium-ah an chhuak a, rorellai member lamin lo dan tumin an innawr a, tui leh lehkha ten an intheh a ni.

Buaina chhuak vang hian rorellai, Democratic People’s Party (DPP)-a legislator chuan hliam a tuar a ni.

KMT legislator-te chuan president Tsai Ing-wen chuan he bill pass a nih theihna atan an ramin Covid-19 hri leng vanga harsatna a tawh mek chu chhuanlamah a hmang niin an puh. He bill hi Tsai party, DPP aṭanga Tawai president hmasa ber, Chen Shui bian-a thubuai nawhrehna atan hman ṭangkai theih niin an sawi. Chen hi kum 2008 khan eiruk thubuai siamsakin thiam loh chantir a ni a, damchhung tang tura hrem a ni. Mahse a hnuah kum 19 tang turina hremna hi tihnep a ni a, a hriselna ṭhat tawk loh vangin tunah hian tan in aṭangin a chhuak rih a ni.

Nimina buaina chhuak hi he bill vanga an vawi khatna buaina a ni tawh lo a, April thlaa preliminary review-an neih ṭum pawhin KMT legislator te'n rorel inkhawm chawk buaiin pawisa note lem an thehdarh avangin boruak sang tak a lo thleng tawh niin sorkar media chuan a tarlang.

KMT chuan nimin khan sorkarin hripui leng a hmachhawn dan sawiselin, naupang zinga Covid-19 thihpui pung zel avangin lungawi lohna an lantir tel bawk.