Malaysia-in NKorea palai hnawtchhuak

Malaysia sorkar chuan North Korea ram hotu, Kim Jong-un-a unaupa, Kim Jong-nam-a thah a nih dan chhuina kal zelah, an rama North Korea ambassador chuan dik lo taka thiltia a puh avangin a hnawtchhuak.

Malaysia Foreign Minister Anifah Aman chuan Inrinni zan khan North Korea embassy hriattirna pein, NKorea ambassador Kang Chol chu an ram chhuahsan turin a hriattir a ni. Hriattirna an hmuh aṭanga darkar 48 chhung ngeia Malaysia chhuahsan turin a hrilh.

Kang Chol hian Kim Jong-nam thih dan chhuinaah, Malaysia thiltih dan chu a dik tawk lo tiin na takin alo sawisel tawh a, Malaysia sorkar chuan thil thup a nei a, NKorea tihhmingchhiat tumin pawn lam mite nen an inthurual niin a puh. Kang-a thusawi avang hian NKorea chu thupha chawi turin Malaysia chuan a phut a, mahse thupha an chawi duh loh avangin Inrinni khan foregin ministry-ah insawifiah turin an ko leh a, hetah pawh hian a kal duh leh tak loh avangin Kang-a hi hnawhchhuah a ni ta a ni.

Minister Anifah Aman chuan Malaysia sorkar tihhmingchhiat leh dawta puhna chu an ngaizam mai dawn lo tih a sawi.

Kim Jong-nam thahnaa hian Malaysia chuan North Korea sorkar a inrawlh niin a ngai a, mahse hei hi NKorea chuan a pha thung. He tualthahna thleng vang hian ram pahnihte inkar pawh a chhiat phah hle a, Malaysia chuan an rama visa telloa North Korea mite an luh a phalsakna dan pawh a tihtawp tawh a ni.

Malaysia chuan Kim hi Kuala Lumpur airport-a a hmaia tur hlauh­awm tak, XV nerve agent tah a nih avanga thi niin a ngai a, mahse NKorea chuan Kim hi lung ṭha lo, zunthlum leh BP sang nei a nih avangin heart attack vanga thi niin a sawi thung. Malaysia thuneituten Kim-a ruang endik an tum pawh NKorea chuan a duh lo a, a ruang hi pe chhuak thuai turin a phut.