EU ramin Russia oil an lakluh 90%-a tihtlem tum
European Union (EU) hotute chuan Thawhṭanni khan EU ram 27-ten Russia oil an lakluh ṭhin chu kumtawp hmaa 90%-a tihtlem an remti.
European Council president Charles Michel chuan Brussels-a neih zawh tak EU summit-ah he thutlukna hi siam a nih thu sawiin, Russia aṭanga oil lakluh ṭhin hmun thum a ṭhena hmun hnih chu an titawp dawn a, hemi hmang hian Russia-in indona hmanrua a leina sum hnar pawimawh tak chu an titawp thei dawn a ni, tiin a twitter-ah a tarlang.
EU hotute chuan Russia-a bank lian ber, Sberbank chu SWIFT system aṭanga paih an remtih bakah, Russian sorkar hnuaia broadcaster pathum dang khapna pawh an tichhuak nghal niin Michel chuan a sawi bawk.
Russia aṭanga oil lakluh ṭhin, 90% tihtlemna tura EU hotuten inremna an siam hi thla thum liamtaa Russia-in Ukraine an run hnua EU-in Russia hrekna a siam zinga khauh ber a la ni.
Russia oil-a innghat Hungary chu an ram eibar zawnna tlachhe mai thei dinhmuna an din avangin ngaihhnathiamna nen lawng hmanga Russia oil phurhluh phalsak ram awmchhun a ni.
EU hian natural gas an lakluh zinga 40% leh oil lakluh zinga 25% chu Russia aṭanga an lakluh hi a ni.
Ukraine ram a run hnuah EU hian Russia lakah hremna chi nga an lekkawh tawh. Mi 1,000 chuang, chung zingah chuan Russia president Vladimir Putin leh sorkara top official-te bakah bank, coal sector leh mimal ṭhahnem takte hrekna hi an tichhuak tawh a ni.
Vienna-a international organization tana Russia palai Mikhail Ulyanov chuan EU-in hrekna a siam chu chhangletin, Russia chuan ramdang hnena thawnchhuah dan kawng an zawn mai tur thu a sawi ve thung.
EU-in Ukraine tan USD tld 9 thawn dawn
European Union hotute chuan indona avanga economy tlachhe mek, Ukraine ṭanpuinan USD tluklehdingawn kua an pe dawn tih EU hotu Charles Michel chuan Thawhṭanni khan a sawi.
Brussels-a EU summit-ah Ukraine ṭanpuina pek tur hi an remti a, European Council chuan Ukraine mamawh angte chu a ṭul anga thawn zel an tum thu Michel chuan a sawi. Mahse ṭanpuina an pek tur hi a thlawna pek tur nge, loan anga pek tur tih erawh an sawichiang lo thung.