Canada-in silai hralhchhuah khap a tum

Canada prime minister Justin Trudeau chuan tunhnaia an ram ṭhenawm, United States-a silaia inpawng kahna thleng avangin Thawhṭanni khan an rama handgun kawllaite khuahkhirhna dan thar siam rawt a nih thu leh, hei hian an silai lakluh leh hralhchhuah thlengin a nghawng thei dawn tih a sawi.

He bill hi law-a chantir tur chuan Parliament-ah an pass erawh a ngai dawn a ni.

"Ram chhunga silai kawltute khuahkhirhna dan thar kan siam dawn a ni ," tiin Trudeau-a'n he thu a sawinaah hian silai hmanga tharumthawhnaa an chhungte chantu, mi eng emaw zat chuan an telpui a ni.

"He dan thar hmang hian Canada ramchhunga silai zawrh, hralh, thawnchhuah leh inhlan chhawn a theih tawh dawn loh," a ti.

Kum 2020, April thla khan Canada rama silai hmanga tharum­thawhna rapthlak ber chu Nova Scotia khawpuiah thlengin, mi 23 te chuan nunna an chan a, he thil thlen hnuah sorkar chuan military-grade leh assault-style firearm lam chi 1,500 khapna a siam zui nghal a ni.

PM Trudeau chuan Thawhṭanni khan silai hmanga pawikhawihna chu a hluar zel thu a sawi. Sorkar-a statistical agency chuan kar liam ta chhung khan silai kaihhnawiha pawi­khawihna chu Canada-a pawikhawihna thleng zinga 3% hnuailam a nih thu an sawi.

Khawpui huam­chhung bika silai hmanga pawikhawihna thleng zinga hmun thum a ṭhena hmun hnihah handgun hi an hman ber a ni. Police-te chuan United States aṭanga bungraw tawlhruk ṭhin avanga pung niin an ngai.

Public safety minister Marco Mendicino chuan an ramah hian handgun maktaduai khat chuang a awm an rin thu a sawi. Kum 10 liamta nena khaikhin chuan a punna hi a sang tawh hle a ni, a ti.