NKorea-in ballistic missile pali kapchhuak

North Korea chuan nimin zing khan Sea of Japan hawiin ballistic missile pali a kapchhuak leh a, heng zinga pathum chu km 1,000 vel an thlawh hnuah Japan exclusive economic zone (EEZ) ah an tla a ni.

South Korea sipaite chuan NKorea hian China ramri bul, Tongchang-ri bial aṭangin missile hi a kapchhuak niin a sawi. Eng ang missile nge a enchhin tih hriatchian a ni lo a, mahse UN chuan NKorea hi missile eng chi mah a enchhin a phalsak lo.

South Korea military official chuan NKorea missile enchhin hi nimin zing dar 7.36 khan kah chhuah a nih thu a sawi a, US pawhin a hnuah missile kahchhuah hi an hriat thu a sawi a, mahse US tan a hlauhawm pha lo tih a sawi.

Kar kalta Zirtawpni khan NKorea chuan South Korea rama US leh SKorea sipaiten nunchan an zirho mek chu an ram beih tumna atana inbuatsaihnaah a ngaih thu sawiin, missile kahchhuahah a lo vau tawh a ni. Thla hmasa khan NKorea hian an ram hotu lu ber, Kim Jong-un-a enpuina hnuaiah ballistic missile thar a lo enchhin tawh bawk.

Japan Prime Minister Shinzo Abe chuan nimina NKorea missile enchhin hi an ram himna tiderthawng thei a ni tih sawiin a dem thu a sawi a, Defence Minister Tomomi Inada pawhin NKorea thiltih chu UN Security Council resolution palzutna a nih thu a sawi. South Korea acting President Hwang Kyo-ahn chuan NKorea a dem thu a sawi.