Nigeria hmeichhia ten lungawi lohna lantir
Nigeria helpawl, Boko Haram-te pawikhawihna thlen ṭhin avanga an in leh lo tlanchhiat sana camp-a khawsa mek, hmeichhe tam takin Pathianni khan dinhmun ṭha zawk pe tura phutin lungawi lohna an lantir.
Pathianni khan UN Security Council palaite chuan camp hi an tlawh a, an tlawh lai hian camp-a awm hmeichhe rualte chuan tualchhung thuneitute leh aid agency hrang hrangten an enkawl dana an lungawi lohna an lo lantir a ni.
Boko Haram helte pawikhawihna Lake Chad biala cheng mi maktaduai 21 zet a nghawng a ni. He bial hian Nigeria, Chad, Cameroon leh Niger ramtea a huam a, kar kalta Zirtawpni aṭang khan heng ram pali-te hi UN palaite hian an tlawh kual a ni.
Helho pawikhawihna thlen bakah, sorkar inrelbawlna ṭha tawk lo leh eirukna nasa avangin mipuiten an tuar nasa a, helho hlaua tlanchhiate pawhin sorkar lak aṭangin enkawlna ṭha an dawng chuang lo niin an sawi.
UN chuan Lake Chad biala harsatna tawk mekte chhawmdawlna tur hian kum 2017 chhung atan dollar tluklehdingawn 1.5 mamawh a nih thu a sawi a, heng zinga a zahve vel chu Nigeria hmarchhak biala chengte chhawmdawlna tur a ni. Ram hrang 14 chuan ṭanpuina tur hian dollar maktaduai 672 pek an tiam tawh a ni.