America mipui tam zawkin Trump-a thusawi ṭha an ti
US President Trump-a’n a ṭum khatna atana Congress joint session-a thu a sawi chu America ram mipui tam zawkin a sawi ṭha niin an ngai.
Gallup-in mipui ngaihdan a lakah, 34% chuan Trump-a thusawi chu a ṭha hle, excellent tiin an chhang a, 23% in a ṭha tawk, good tiin an chhang bawk. 25% chuan ṭha thawkhat, OK tiin an sawi a, 7% in a ṭha lo, poor tiin, 9% chuan sawi ṭha lo hle niin an ngai.
President Trump-a’n president a nih anga a hna a thawh dan chungchangah 36% chuan a hma aiin an ringtawk tawh zawk tih an sawi a, 53% chuan Trump-a an rin dan a danglam phah lo niin an sawi thung.
Congress joint session-a President Trump thusawi, television-a tihchhuah lo thlirtu hi mi maktaduai 48 vel an ni a, kum 2009-a President hlui Barack Obama’n Congress joint session-a thu a sawi khan thlirtu mi maktaduai 52 an awm a ni.
President Trump-a thusawi lai hi Republican party leh a thlawptu lam independent zingah thlirtu 85% an awm laiin, Democrats leh Democratic party lam awntu zingah 68% chauhin an thlir thung.
Democrats party member zingah President Trump-a thusawi an ngaihthlak hnua a hmaa aia a laka rinna nghat ngam 5% an awm a, a hma aia ring ngam lo zawk 15% an awm laiin, 80% chuan an ngaihdan a danglam loh thu an sawi. Hetih lai hian Republican member zinga 10-a paruk zelin President Trump-a lakah hian a hma aiin rinna an nghat ngam tawh zawk niin an sawi.