NKorea-in Malaysia mite chhuah phal lo

Malaysia rama North Korea ram hotu, Kim Jong-un-a unaupa, Kim Jong-nam-a thah a nih chungchanga ram pahnihte inkar boruak ṭha lo kal zelah, NKorea chuan an rama Malaysia mi awmte chu phalna nei loa an chhuah a remti lo.

Malaysia sorkarin Kim Jong-nam-a thih dan a chhui danah NKorea hi a lungawi lo hle a, tualthahnaa NKorea sorkar a inrawlh nia thuthang awm chu an ram tihhmingchhiat tumnaah a ngai a ni. Kim-a thah a nih dan an chhui dan kawngah NKorea ambassador chuan Malaysia thuneitute a sawisel avangin Malaysia aṭanga hnawhchhuah a lo ni tawh bawk. Hemi hnu hian NKorea pawhin an rama Malaysia palai awm chu a hnawtchhuak ve leh bawk a ni.

Kim Jong-nam-a ruang hi Malaysia ramah a la awm mek a, NKorea chuan a ruang hi enfiah kher lo a, an kuta hlan turin a phut a ni.

NKorea state news agency KCNA chuan an rama Malaysia mi awm mekte an chhuah phalsak a nih loh thu hi nimin khan a tichhuak a, Malaysia nen an inkar boruak chinfel a nih hma chuan NKorea chhuahsan phalsak an ni lo tih a sawi. Hemi rual hian Malaysia mite chu enhran leh tihduhdah an ni dawn lo a, an nunphung pangngai anga an awm zui zel theih tur thu a sawi bawk.

NKorea-in thupek a tihchhuah hnu lawk hian Malaysia Deputy Prime Minister Ahmad Zahid Hamidi chuan a chhang let ve nghal a, an rama North Korea embassy-a thawk leh official-te chuan an ram an chhuahsan thei bik dawn lo tih a sawi. Hamidi chuan he thil hi tih duh lo hle mah se, ti lo thei loin NKorea chuan a siam ta niin a sawi. Kuala Lumpur-a NKorea embassy kal pawhna kawngpuite chu an dan nghal thu a sawi bawk.