SKorea-a THAAD system dahna tur US-in buaipui ṭan

South Korea-a missile defence sytem, Terminal High Altitude Area Defense (THAAD) interceptor bun tur chu buaipui ṭan a nih thu US chuan a sawi.

NKorea ramri bula THAAD system dah tur hian US leh SKorea chuan ruahmanna an lo siam tawh a, he system hi NKorea-in a beih thulh pawha lo invenna tur atana tih a ni. NKorea chuan THAAD system dan an tum hi na takin a lo sawisel tawh a ni.

SKorea news agency, Yonhap chuan Thawhṭanni khan THAAD battery hi an bun ṭan tih a sawi a, khawl ṭhenkhat chu US aṭangin Seoul bula air base-ah phurh thlen a ni tawh tih a sawi. He system an bun tur hi kumin kumtawp lamah hman ṭan theih beisei a ni tih a sawi bawk.

US leh SKorea-te’n THAAD system an bun tur hi short and medium range ballistic missile kapthla thei tur a ni a, km 200-a thui leh km 150-a sang chinah hman theih a ni ang. Radar system chuan SKorea lam hawia missile kahchhuah chu a lo man thei dawn a, heng missile-te hi interceptor missile hmangin a lo bei let thei dawn a ni. Launcher truck hian interceptor missile pariat a kapchhuak thei dawn a ni.