Trump-a’n ‘travel ban’ thar a siam
US President Donald Trump chuan an rama zin luh tumte tana khuahkhirhna thupek, ‘travel ban’ a siam thar leh. He dan tharah hian a hmaa Muslim ram pasarih aṭanga US luh tumte tana khapna siam chu ram paruk-ah tihhniam a ni a, Iraq ram chu telh a ni tawh lo.
President Trump-a thupek siam tharah hian Muslim ram paruk - Syria, Iran, Libya, Somalia, Yemen leh Sudan ram aṭanga US-a zin tumte tana visa pek ṭhin chu titawp tura tih a ni a, thupek a tihchhuah hmasaa Iraq ram telh chu telh chhunzawm a ni tawh lo a, hei bakah hian he thupek thar hian permanent US resident-te a huam tel lo bawk.
White House chuan President thupek thar hi March 16 aṭang hman ṭan tur a nih thu a sawi a, Secretary of State Rex Tillerson chuan he thupek hi an ram himna tihchakna tura thil pawimawh tak niin a sawi.
Attorney General Jeff Sessions chuan ram paruk tarlan zinga pathum, Iran, Sudan leh Syria te chu firfiakte thlawptu ram nia sawi a ni tih a sawi a, ram dangte pawh hi firfiakte tan hmun ralmuang leh duh thala an awm theihna hmun a ni, a ti.
President Trump-a’n January 27-a thupek a tihchhuah hmasakah khan Muslim ram pasarih aṭanga luh khapna leh, raltlante lakluh khapna siam a ni. He thupek hman a nih chhung hian State Department chuan visa 60,000 chuang a cancel hman a, US airport-ah mi eng emaw zat hren an ni bawk.