Germany-in lockdown pawtsei

Germany chuan Covid-19 leng vanga partial lockdown a puan chu nakkum January thla tir lam thleng atan a pawtsei. 

Chancellor Angela Merkel chuan November thla tir lam khan partial lockdown hi a puang a, an rama hri kai zat a tlahniam fe a nih loh chuan inkhuahkhirhna hi thlahdul mai an la tum lo tih a sawi.

Merkel chuan December 20 thleng tan khuahkhirhna hi siam a ni a, mahse  hri pun chhoh dan ngaihtuahin nakkum January thla tir lam thleng hman chhunzawm a ni ang, a ti. Khuahkhirhna siam hnuaiah hian restaurant, bar, infiamna leh intihhlimna hmunte khar a ni a, school leh dawrte erawh  hawn a ni thung. 

December 1 aṭangin chhung­kaw hnih aṭanga mi 10 chin awmkhawm phalna chu pangaah tihtlem a ni dawn a, naupangte erawh a huam tel lo ang. December 23 aṭanga January 1 chhungin puitling awmkhawm phal zat chu holiday pualin mi 10 chinah ngaihnathiam a ni thung ang. Mahse party buatsaih erawh phal a ni lo a, in khatah awmkhawm phal chin a ni. 

Krismas leh Kumthar lawmna puala public square-a halmawi halte khap a ni dawn a, hei hi mipui pungkhawm tur venna atana tih a ni. Hri darh tur venna atan hian ski resort-te pawh khar a tum bawk.

Merkel chuan khuahkhirhna thlahdul tur chuan kar khata hri kai thar zat mi nuai zinga mi 50 aia tlem a nih hunah chuah a ni dawn tih sawiin, tuna an ram dinhmunah chaun mi nuai khatah mi 140 dawnin kar khat chhungin hri kai thar zel ang an ni.