SKorea leh China-in inbiak chhunzawm remti

South Korea leh China chuan North Korea nuclear programme chungchanga inbiakna an neih, hun eng emaw chen tihbahlah tawh chu chhunzawm leh an remti. 

Ningania South Korea president Moon Jae-in leh China top diplomat, Wang Yi-ten inbiakna an neihnaah NKorea nuclear programme talk chu neih chhunzawm leh an rel. President Moon chuan Korea rama remna leh muanna a awm theihna atana China-in a thawhpuinaah lawmthu a sawi. 

President Moon chuan, "Korean Penin­sula-a innghirnghona awm ṭhin tihtawp a nih theihna atan a kaihhruai sorkar chuan theihtawp a chhuah zel dawn," tiin, he hmuna boruak ṭha leh muanawm a awm theihna atan ram dangte, a bikin China nen telin thawhhona ṭha tak an neih a ṭul thute a sawi a ni. 

Wang pawhin Korean peninsula buaina chu inbiakna hmanga chinfel chi a nih thu  sawiin, indona leh innghirnghona lian zawk a chhuah lohna tura a tahtawl te tea hma lak a ṭul a ni,a ti.  

Ningani vek khan Wang chuan SKorea foreign minister Kang Kyung-wha kawmin, China President Xi Jinping-a'n SKorea a tlawh tur chungchangte an sawidun. Xi hian a hmain SKorea-a zin hi a tum tawh a, mahse Covid-19 vangin a sawn hla a ni.