Hawaii state-in President Trump-a thupek khing dawn

US President Donald Trump-a’n Muslim ram paruk aṭanga US-a luh tumte tana khuahkhihrna dan thar a siam chu Hawaii state chuan khin let a tum.

President Trump-a’n ‘travel ban’ thar a siamah hian Muslim tamna ram paruk - Iran, Syria, Somalia, Sudan, Yemen leh Libya ram aṭanga US luh khapna dan siam a ni a, heng ram mite tana visa pek titawp tura tih a ni. Mahse he khapna hi US permanent resident-te erawh a huam tel lo ang. He thupek thar hi ni 90 awh tur a ni a, March 15 aṭanga hman ṭan tura tih a ni. Hei bakah hian March 16 aṭanga hman ṭan turin ni 120 chhung raltlante lakluh khapna a siam bawk.

Thupek tihchhuah tharah hian a hmaa Trump-a’n ram pasarih a lo tarlan tawh aṭangin Iraq ram chu paih a ni a, hei hi Iraq sorkarin visa screening leh data sharing lam a kalpui ṭhat vang niin White House chuan a tarlang. State Department-in a lo pawm tawh, raltlante pawh US-ah luh phalsak an ni bawk ang.

Iran chuan US President thupek thar hi sawiselin, an ram mite luh khapna siam a nih chuan Iran rama US khualzin luh khapna a siam ve dawn tih a sawi. President Trump-a thupek siam chu international rules kalh a ni, a ti.

Somalia President Mohamed Abdullahi Mohamed pawhin khapna siam thar a ni leh chu ṭha a tih loh thu a sawi. US-Somali dual citizen, President Mohamed chuan US ram chhunga Somalia mi 150,000 vel awm mek chuan US economy leh society lamah kawng hrang hrangin an tha an thawh a ni tih a sawi a, mi tlemte buaina leh harsatna siam mah se, a tam zawkin US tana an thawhhlawk dante chu an ngaihtuah a ngai niin a sawi.

Sudan foreign affairs ministry pawhin khapna dan siam thar a ni leh chu pawi a tih thua sawi a, US-a pawikhawihna leh firfiaka chetna thleng ṭhinah Sudan mi inrawlh an awm ngai lo a ni, a ti.