Turkey, Russia leh US sipai hotute inkawm

Turkey, US leh Russia sipai general-te chuan Islamic State (IS) firfiakte beih let mek an nih dan leh, Syria leh Iraq tualchhung dinhmunte an sawiho.

Thawhlehni khan Turkey chhim lam khawpui, Antalya-a Turkey chief of staff Hulusi Akar, US chairman of joint chiefs of staff Joseph Dunford leh Russia chief of general staff Valery Gerasimov-ten meeting an nei a ni. Sipai hotu inhmukhawmte hian security chungchang, a bikin Syria leh Iraq dinhmunte an sawiho a, hma lak dan tur ruahmannate pawh an siam nghal bawk.

Turkey Prime Minister Binali Yildirim chuan sipai hotute hian nimin khan meeting hi an neih chhunzawm thu a sawi a, Syria ram aṭanga firfiak pawlte nuaibo an nih theihna tura thawhhona

ṭha leh awmze nei an neih a ngaih thu a sawi. Firfiakte laka beihpui thlak meknaah ram tam tak an inrawlh a, hei vang hian thawhhona ṭha an siam loh chuan an beisei ang hlawhtlinna chu an hmuh theih loh a hlauhawm a ni tiin, hei hi meeting an neih chhan pawh niin a sawi. Thawhlehni-a ram pathum sipai hotuten meeting an neih hi a hmain puanzar lawk a ni lo.