Thu dik lo hian Covid-19 vaccine hlauhna a thlen thei : WHO

Chanchinthar dik lo leh thu belhchian dawl lo thehdarh avangin mipuiah Covid-19 vaccine hlauhna a thlen theih thu  World Health Organisation (WHO) chuan a tarlang.

WHO chuan vaccine chungchanga thudik lo leng vak tam tak avang hian mi tam tak te chuan peihfel a nih hunah pawh vaccine lak hi an hreh theih thu a sawi. Covid-19 hri leng mek hi technology leh social media kan hman hnua khawvel pum huapa hri leng hmasa ber nia tarlangin, hei vang hian mitinte chu technology leh social media hmang thiam turin WHO chuan a ngen a ni. 

Covid-19 vaccine enchhinna ṭhenkhat chu a tawp lam hnaih a nih tawh thu WHO chuan a tarlang a, vaccine hi a siamtute chuan nakkum lamah chuan peihfel hman an tum fur tawh a ni. Hetih lai hian vaccine chungchangah thuthang dik lo leh thu belhchian dawl lo hriat tur a tam hle a, hei hian Covid-19 vaccine hlauhnaah leh immunization programme-ah a ṭha lo zawngin nghawng a nei theih tih WHO-a expert-te chuan an sawi. 

Covid-19 vanga thi hi khawvel pumah mi maktaduai 1.4 chuang an awm tawh thu WHO chuan a tarlang a, Europe chu khawvela Covid-19 hri kai nasa ber ram an nih thu sawiin, he hri vanga thi pawh Europe-ah hian an tam ber bawk. 

UN health agency tarlan dan chuan kar liam taa khawvela-a Covid-19 hri kai zinga 44% chu Europe rama mi an nih thu leh he hri vanga thi zinga 49% chu Europe aṭang bawkin a ni tih a tarlang.