US-in Ukraine hnenah Advanced Rocket System pe dawn
US president Joe Biden chuan Ukraine hnenah hmun hla zawka awm target kap fuh thei, advanced rocket system pek a remti. Hei hi weapon package, USD mtd 700 hu a pek tur zingah a tel dawn a ni.
Ukraine hian he rocket, km 80 thleng kap pha hi Russia ram chhung beihna atan a hmang dawn lo tih a intiam hnuah, US hian high mobility artillery rocket systems pek hi a remti ta niin official-te chuan an sawi.
President Biden chuan Russia-in Ukraine ram a run mekna chu inbiakna hmanga tihtawp theih a ni tih a sawi a, hemi rual hian US chuan Ukraine tan hian ralthuam ṭhahnem tak a pek erawh a ngai niin a sawi. "Hei vang hian Ukraine mipuite tan, an rama indona hmuna an target-te an kah fuh theihna turin advance rocket systems leh a mu tam tak pek hi ka duh ta a ni," a ti.
He system hian precision-guided missile ṭhahnem tak, km 70 vela hla thleng kap fuh thei a kapchhuak thei dawn a, Ukraine ralthuam neihsa aiin a kap thui thei zawk a, Russia ralthuam ai pawhin a kap dik thei zawk bawk a ni. US mithiamte chuan ralthuam chu Ukraine-in Donbas region khawchhak lama khawpui inbeihna thlen nasat zualna hmunah an hman nghal an rin thu an sawi.
US-in Ukraine tana weapon package a pek turah hian silai mu, counter fire radar, air surveillance radar, Javelin anti-tank missile bakah anti-armor weapon a tel thu official-te chuan an sawi a ni. Ukraine hian February 24-a Russia-in an ram run aṭang khan US aṭangin sipai ṭanpuina ṭhahnem tak a dawng tawh a ni.