Australia sorkar tharah hmeichhe minister 13 an awm, record thar an siam

Australia sorkar thar chu nimin khan lakluh niin, minister lakluh zingah hmeichhia 13 an awm, Muslim hmeichhe zingah minister atana lakluh hmasa ber pawh a tel.

Prime minister Anthony Albanese-a'n an ram inthlana centre left Labor Party chu hnehna ropui tak a chanpui aṭang ni 11 hnuah, a minister turte hi an khawpui, Canberra-ah governor-general David Hurley chuan a lalut a ni.

PM Albanese chuan Australia ram ang maia sorkar huamzau a kaihruai thei dawn chu a inchhuang hle tih sawiin, Labor member thar zawng zawngte an lo lawm thu a sawi.

Australia-a muslim hmeichhe zinga minister hmasa ber ni turin Anne Aly chu lakluh a ni a, muslim mi tho Ed Husic chu cabinet chang pha zingah a tel bawk. Linda Burney chu ram leilung fa, hmeichhe zinga Indigenous Affairs minister ni thei hmasa ber a ni.

Sorkar thara minister 30 lakluh zingah a chanve dawn chu hmeichhia an ni. Cabinet-a hmun pawimawh chang pha chin mi 23 zinga 10-te chu hmeichhia an ni.

Thla hmasa inthlanpuia vote tlate hi chhiar kim ala ni lo a, mahse Labor party chuan seat 150 awmna House-ah majority a nei chiang tawh thung.