Mosul aṭangin IS hotu a tlanchhia

Islamic State (IS) firfiak pawl hotu, Abu Bakr al-Baghdadi chu Mosul aṭangin a tlanchhuak a, khawpui chhunga an pawl enkawl hna chu commander-te kuta hlan niin, US defence official chuan a sawi.

Kum 2014 July thlaa vantlang hmuha a inlan ṭum khan, Baghdadi chuan Syria leh Iraq ram an lakah Islam ram din a nih thu a puang a ni. Mahse Iraq sipaiten Mosul khawpui laklet tumin ngawrh takin beihpui an thlak mek a, khawpui chhung hmun tam zawk chu firfiakte kut aṭang hian an laksak tawh niin an sawi. Sipaite hian khawpui hi hmun hrang hrangin an hual a, khawpui puma thuneihna chu an chang leh thuai dawn niin an sawi.

US defence oficial chuan Iraq sipaiten beihpui an thlak ṭan hma hian Mosul-ah Baghdadi hi a awm ngei niin an sawi a, mahse sipaiten Mosul leh Tal Afar-te an hualbeh hmain a tlanchhuak hman nia hriat a nih thu a sawi.

US special operation force bakah group dang dang pawhin Baghdadi hi man tumin an veh mek a ni.

IS hian Iraq leh Syria-a ram an lak tam zawk chu an hloh leh tawh a, an ram lak 65% chu security force-te’n an lak let sak tawh a ni.

Mosul lak let tuma beihpui thlak mek, Iraq security force-te chu khawthlang ramten an pui bawk a, Mosul khawchhak lam bial chu an lak let tawh bakah, khawthlang lamah firfiakte nen an la inbei mek a ni. Mosul aṭang hian firfiakte hi eng emaw zat an tlanchhe tawh nia sawi a ni bawk.

Baghdadi hian Mosul khawpuiah an dinhmun a chau sawt hle tih pawh a hria a, hei vang hian a hmaa audio message a tihchhuahah, an pawl member ramdang mi awmte chu an ram lamah kir emaw, thihchilh bomb tipuak mai tur emaw in a lo fuih tawh a ni.

Iraq leh Syria ramah hian IS firfiak 15,000 vel an la awm mek a, heng zinga 2,500 vel chu Mosul-ah an la awm a, Mosul ṭhenawm Tal Afar-ah eng emaw zat awmin, Raqa-ah firfiak hi 4,000 vel an la awm bawk.