SKorea court-in President Park-i paihthlak a remti

South Korea Constitutional Court chuan Parliament-in President Park Geun-hye-i paihthlak a lo rel tawh chu a pawmpui.

Constitutional Court judge pariat-te chuan eirukna kaih­hnawiha President Park-i paih­thlakna hi an pawmpui a, South Korea rama presidentṭanglai paihthlak a nihna hmasa ber tur a ni.

President hi ban a nih dawn tak avangin ban a nih aṭanga ni 60 chhung ngeiin inthlan buatsaih tur a ni.

Nimina court thutlukna puan a nih dawn hian Park-i thlawptu mi tam tak chu Seoul-a Constitutional Court bulah an pungkhawm a, court bulah hian television big screen-in court thurel hi an lo thlir a ni. Court thutlukna siam dan duh loin mi tam takin lungawi lohna an lantir zui bawk.

Kum 65 mi, Park-i hi a ṭhianṭha tak Choi Soon-sil-i chu sor­kara nihna pawimawh engmah a nei lo chungin sorkar policy siamnaah leh inrelbawlnaah inrawlh tirah puh a ni a, hei bakah hian sorkar duhsakna an dawn theih nan Choi-i enkawl foundation pahnih ta sumdawng liante chu sum tam tak thawh tirah puh a ni bawk. Foundation tana sum petu zing ami, Samsung Group hotu chu kum 2015-a Samsung unit pa­hnih chhunfin an nihna tura sorkar pawmpuina an hmuh theih nana foundation tana sum tam tak peah puhin thubuai siamsak a ni bawk.

Park-i chuan thil dik lo tih a neih loh thu a sawi a, mahse sorkar inrelbawlna kawnga a ṭhian Choi-i a inrawlh tir avang­in mipuite hnenah thupha a lo chawi tawh a ni.

President aṭanga paih a nih hnuah Park-i hian president ṭang­lai hrem theih loha humna chu a nei theih tawh dawn loh avangin thubuai siamsak ngei a nih rin a ni.

SKorea parliament chuan nikum December thla khan Park-i hi president a nihna aṭanga paihthlak a nih dan tur a ngaihtuah a, president a nihna aṭangin chawlh tir a ni a, prime minister chu president mawhphurhna lak tir a ni. December 9-a National Assembly-in impeachment bill a ngaihtuah aṭangin court-ah hearing hi ṭum 20 neih a ni a, ni 92 hnuah court-in thutlukna hi a siam thei chauh a ni.

Constitutional court chief justice Lee Jung-mi chuan, Park-i chet dan chu democracy tihmelhem tumna leh, an ram dan palzutna a ni tih a sawi. Park-i chuan sorkar inrelbawlna kawngah Choi-i chu inrawlh tirin, a thiltih hi a zep thlat a, amah ringhleltute chu a lo sawisel let zawk ṭhin a ni, a ti.

Park-i hi president aṭang hian paihthlak a nih vangin president hluiten hamṭhatna an dawn ang tam zawk chu a dawng chhunzawm ve thei dawn lo a ni. Thla khat penison hlawh, maktaduai 12 (US dollar 10,400) an lak ṭhin pawh pek a ni dawn lo a, president hlui hnena chauffear leh secretary pathum pek ṭhin pawh pek a ni dawn lo a, damdawi lama inenkawlna a thlawn a an dawn ṭhin ang pawh Park-i hi pek a ni dawn lo bawk.