US-in Syria-ah artillery unit tir

US kaihhruai ṭangrual ramten Syria rama Islamic State (IS) firfiak laka beihpui an thlak mekah, US chuan tualchhung sipaite pui turin Marines artillery unit tirh an nih thu a sawi.

Ṭangrual pawl thupuangtu, US Air Force Colonel John Dorrian chuan, sipai tirh luhte hian Syrian Democratic Forces (SDF) leh Syrian Arab Coalition te an puih tur thu a sawi. Sipai tirh luh thar hi an vaiin 400 an ni a, Syria-ah hian US sipai 500 vel an awmsa bawk a ni.

Syria rama IS firfiak laka beihpui thlaknaa US thawhpui pui ber chu SDF hi an ni a, nikum November thla aṭang khan Syria rama IS ho inkhuarna pui ber, Raqqa lak tumin US kaihhruai ṭangrual ramte nen hian an bei mek a ni. Raqqa hi an hual bet tawh a, tunkar tir lam khan SDF chuan Raqqa leh IS chakna bial, Deir al-Zor province inkalpawhna kawngpui te an dang tawh bawk.

Dorrian chuan US sipaite hian Raqqa-a IS firfiakte hneh an nih ngei theih nan an pui dawn a, sipaite hi 155-millimetre artillery gun nena thuam an nih thu a sawi.