NKorea-a Covid-19 hri leng dinhmunin chhiat lam a pan : WHO

World Health Organization chuan North Korea-in an rama Covid-19 hri leng dinhmun chuan ziaawm lam a pan zel tih a sawi chu a rinhlelhawm thu sawiin, data mumal tak engmah a awm loh avangin hri leng dinhmun hian ṭhat lam aiin chhiat lam a pan zel niin a sawi.

Kar hnih liam ta khan ni khatah khawsik nei hmuh chhuah mi 3,90,000 te an awm a, mahse hemi hnu reiloteah NKorea state media chuan Covid hri leng chu a ziaawm tawh hle tih a sawi nghal a ni.

NKorea hian khawsik nei zatte tarlang mah se, Covid-19 hri kai hmuh chhuah zat tak erawh a tarlang ngai lo. Media-te hi sorkarin a thunun vek avangin, an ram dinhmun dik tak, hri len dan kimchang chu hriat chian a harsat thu mithiamten an sawi.

"An dinhmun hian ṭhat lam aiin chhiat lam a pan kan ring a ni," tiin WHO emergency hotu Michael Ryan chuan Nilaini khan a sawi. Ryan chuan WHO hian state media puanzar chin bak chu hriatbelh theih dan kawng an neih bik loh thu a sawi. "An rama thil thlen dan leh raw data kimchang tak kan neih theih loh avangin harsatna kan tawk a ni," tiin WHO chuan a ram ṭhenawm South Korea leh China aṭanga thil kimchang hriat theih dan kawng an zawn thu a sawi a ni.

WHO hian vaccine leh hri enkawlna atana mamawh dang supply leh ṭanpuina pek an inhuam thu an sawi.

NKorea hian an rama Covid-19 darh vangin rampumah inkharkhip an kalpui chungin khawsik nei mi 96,610 an hmuh belh tih KCNA news agency chuan nimin khan an puang. Hetih lai hian, thihpui zat erawh an puangzar lo thung.

KCNA chuan hri leng tihtawp a nih theihna turin dan khauh zawk an tichhuak leh a, heng zingah hian lockdown leh coastal blockade siam te, damdawi leh medical supply tam zawk siamchhuahte leh khawpui kah thianghlim hna kalpuite a tel. North Korea premier Kim Tok Hun chuan pharmaceutical factory ṭhenkhat pawh tlawhin, hri leng do hna kalpui mekah damdawi tam zawk siamchhuah leh supply chu mipuite nunna venhimna leh hriselna ṭha neihna tura thil pawimawh leh ṭan lak ngaihna anih thu a sawi.