Turkey-in an official hming 'Turkiye' tihin thlak

Turkey chuan official-in an ram hming chu Turkiye tihin an thlak a, United Nations hnuaiah pawh an in ziaklut tawh niin foreign minister Mevlut Cavushoglu chuan twitter-ah a ziak.

"President Recep Tayyip Erdogan hnuaiah kan ram hming thlak tura kan beihna chu kan tifel thei ta. UN Secretary-General hnena vawiina ka lehkhathawn hmangin Turkiye tihin kan thlak tih kan hrilh a ni," a ti.

Google Maps, Apple Maps leh platform dangah pawh tun aṭanga hun rei lo te chhungin an ram hming thar ang hian thlak vek a nih thuai beisei a ni bawk.

President Recep Tayyip Erdogan-a'n nikum December thla khan mipuite chu Turkiye tiha ram hming an thlak tum chungchanga an ngaihdan a lak hnuah, a hming thlakna tur hian hma an la chhunzawm ta a ni. Memorandum-ah hian, Turkey president chuan ramdanga an bungraw thawnchhuah ṭhin a "Made in Turkey" tih in ziak chu "Made in Turkiye" tia thlak vek turin company-te chu a ngen. State agency-te pawh an ram hming thlakna ang hi hmang turin a ti bawk.

Kumin January 13 khan, Turkish Presidency Communications Directorate chuan mipui tam zawkin an hriat tlangnel theihnan campaign thar “Hello, Türkiye” tih chu an tlangzarh a ni.

Ram hming thlak danglam hi thil thar a ni lo a, Netherlands chuan "Holland" tih chu an lo paihbo tawh a, "Macedonia" chuan Greece nen politics thilah buaina an neih avangin North Macedonia tihin an lo thlak bawk. Kum 1935 khan Persia chu Iran tihin thlak a lo ni tawh bawk.