Myanmar-ah himna zawnga tlanchhia mtd 1 chuang awm tawh : UN

Myanmar sipaite'n thuneihna an chan aṭangin himna zawnga tlanchhia chu mi maktaduai khat an chuang tawh niin UN chuan a sawi. Inbeihna chhunzawm reng leh, fur lo thleng chho nen heng mite dinhmun hi a chhe dawn hle a ni, a ti.

Nikum February 1-a Aung San Suu Kyi kaihhruai sorkar paihthlak a nih hnuah mi nuai sarih vel chuan an chenna an chhuahsan tawh tih UN Office for the Coordination of Humanitarian Affairs (UNOCHA) chuan a sawi.

Civil sipai intelkhawmte chuan ramchhunga sipaite beilet turin theihtawp an chhuah a, heng mite an beihletnaah sipaite chuan thingtlang khuaa in inhalsak, tawng pawng inthahna leh thlawhtheihna hmanga civil mite laka beihpui thlak te an kalpui nasa tih rights group-te chuan an sawi.

Civil sorkar paihthlak a nih hma pawh khan himna zawnga chenna in chhuahsan mi 3,46,000 chuang an awm tawh a ni. Heng mite hi Thailand leh China ramri hrula sipai leh helpawlte inbeihna avang tlanchhia te, kum 2017-a Rohingya Muslim-te laka beihpui thlak a nih avanga tlanchhiate an ni.

UNOCHA chuan sipaiten thuneihna an chan hnuah civil mite chenna in 12,000 chu halsak emaw tihchhiat sak emaw an nih tawh thu a sawi. Heng mite hi camp-ah an khawsa mek a, fur a lo thlen dawn avangin a ngaihtuahawm dawn hle a ni, a ti.

Himna zawnga tlanchhe zingah mi nuai thum chuang chu Sagaing bial hmarthlang lama mite an ni a, helai bial hi tualchhung helpawl leh sipaite inbeih ngunna hmun a ni. Thuneitute chuan Sagaing leh a ṭhenawm, Magway bialah mobile data service an titawp a; buhfai, damdawi leh fuel phurhluh kawngah pawh khuahkhirhna an siam bawk. Heng area-ah te hian health service, eitur leh chhawmdawlna hmanrua an mamawh tawh hle nia sawi a ni.