SKorea president paihthlak lawmin mipuiten kawng zawh

South Korea president aṭanga Park Geun-hye paihthlak a nih lawm­in kar kalta Inrinni zan kha Seoul-ah a lawmna kawngzawh buatsaih a ni a, mi tam tak an pungkhawm.

South Korea parliament-in Park-i banna tur thutlukna a siam chu kar kalta Zirtawpni khan constiutional court chuan a pawmpui a, Park-i hi president ṭanglai zingah impeachent rule hmanga paihthlak hmasak ber a ni.

Court thutlukna lawm hian Inrinni zan khan Seoul-a Gwang­hwamun Square-ah mi tam tak an pungkhawm a, rimawite tumin mipui pungkhawmte chuan bati an chhi bawk. President paihthlak phut hian a hmain ṭum eng emaw zat an lo pungkhawm tawh a ni.

Kum 65 mi, Park-i hi president aṭanga paihthlak a nih tak avangin president ṭanglaiin thubuai siamsak theih loh tura humhimna a neihte a hloh tawh a, hei vang hian thamna pek tir leh thuneihna dik lo taka hmanga puhna thubuai pawh siamsak a ni mai thei nia sawi a ni.

Mipui ngaihdan lakah, South Korea mipui 69.4% chuan Park-i hi chhui chian a nih theih nana man an duh a, hetih lai hian 17.8% chuan man kher loa chhui chian an duh thung.

SKorea mipui 92% chuan constitutional court thutlukna siam chu thutlukna dik tak niin an ngai a, court thutlukna pawmpui lo hi 6% chauh an awm thung.