Netherlands-in Turkey minister hnawtchhuak

Netherlands sorkar chuan Rotterdam-a rally neih tura Turkey Family Affairs Minister, Fatma Btul Sayan Kaya-i thusawi tur chu a khapsak hnuah, minister hi an ram aṭangin a hnawtchhuak.

Nimin zing khan Dutch police-te chuan minister Kaya-i hi Germany ramri-ah hruaiin, Germany aṭang hian Turkey ramah a haw leh nghal a ni.

Kaya-i hian Turkey President Recep Tayyip Erdogan-a’n an ram danpui siamṭhat tuma rawtna a siamte thlawpin, hemi pual hian Rotterdam-ah hian rally neih a tum a ni. Mahse Rotteram a thlen hian security official-te’n lo dangin hun rei tak ministery convoy leh tualchhung police-te chuan an inep zui a ni.

Rotterdam Mayor Ahmed Aboutaleb chuan a hma aṭangin Dutch thuneitute chuan Kaya-i campaign neih tur chu an duh lo tih pawh an sawi lang tawh niin a sawi. Hetichung hian an ramah rally neih tum hian a kal lui a, Dutch sorkar remtihna nei loa kal a nih avangin an danah chuan a rawn kalna ramah thawn kir leh nghal tur tih a ni, a ti.

Netherlands sorkar hian a hma pawhin Turkey president tana campaign tum, Turkey Forein Minister Mevlut Cavusoglu chu an rama a luh a lo remti lo tawh bawk. Heng thil thleng vang hian Turkey President Erdogan chu a lungawi lo hle a, Dutch sorkar chu Nazi chambang a ni, a ti.

Netherlands-ah hian Turkey mi 400,000 vel an awm a, April 16-a President Erdogan-a’n ram danpui siamṭhat a tum chungchanga mipui ngaihdan lak hunah pawh heng mite thlawpna hmuh ngei tumin Turkey sorkar chuan ṭan a la mek a ni.