Damascus-a bomb puakah mi 59 an thi
Syria ram khawpui, Damascus-ah kar kalta Inrinni khan ṭum hnih bomb a puak a, mi 59 an thi. Thi zinga a tam zawk hi Iraq mi leh sa an ni.
Bomb hmasa zawk hi Shitte biakzina kalte chuanna bus beih nan tihpuah a ni a, a hnuah Bab al-Saghir bialah thihchilh bomb tihpuah a ni leh bawk. Bab al-Saghir-ah hian Shiite mausoluem eng emaw zat a awm a, khawvel ram hrang hrang aṭangin Shiite muslim-te’n an tlawh fo ṭhin.
Damascus-a bomb puaka thi zingah hian biakzina kal mi 47 an tel a, Syria sorkar tana beitu pawl member 12 an thi bawk. Hliam tuar mi 120 chuang an awm. Iraq forign ministry chuan bomb puak vanga thi zingah hian Iraq mi 40 an tel niin a sawi.
Syria leh Iraq rama Shiite hmun thianghlimte chu Sunni muslim firfiakten an bei fo a ni. Inrinni-a pawikhawihna thleng pawh hi Al-Qaida firfiak pawl hnuai ami, Fateh al-Sham Front-te’n an tih niin an chhal.