North Korea-in DMZ-ah loudspeaker a dah

North Korea sipaite chuan South Korea nena an inrina, demilitarised zone (DMZ)-ah loudspeaker broadcast ṭhahnem tak an dah lai an hmu niin SKorea sipaite chuan an sawi.

Ramri hrula an dah, he loudspeaker broadcast hmang hian ram pahnihte hian an inpuh tawnna chungchang leh an dik lohna te chu an sawi chhuak ṭhin a ni. Kum 2018 khan loudspeaker broadcast hmang tawh lo turin inremna an lo siam tawh a, SKorea sipaite hian ramria NKorea lamin an dah leh thu an sawi tak avangin he inremna an lo siam tawh hi a bawhchhe zawkah NKorea a ṭang dawn niin a lang.

NKorea-in hetianga loudspeaker broadcast dah leh chhan hi tun hnaia SKorea-a pawl ṭhenkhatin ramri pela NKorea lama balloon hmanga sorkar sawiselna thu ziak leh thil dang an thawn luh ṭhin avanga a lungawi lohna a tihlanna nia ngaih a ni. 

SKorea defence ministry thupuangtu chuan NKorea-in hmalakna rawn neih thar a tum chuan anni pawhin loudspeaker chu dah ve leh an tum tih a sawi. 

Thawhlehni khan Park Sang-hak kaihhruai pawl pakhat chuan balloon 20, a chhunga leaflet 500,000 awm tel, booklet 500 leh $1 bill 2,000 chu NKorea lamah ramria Paju khua aṭangin an thawn lut tih Park chuan a sawi. He thil vang hian NKorea chu a thinrim hle a, a rang thei ang ber heng hmalaknate hi titawp turin SKorea chu a vau a, a hnuah South Korea thungrulhna turin dodalna thu ziahna lehkha (leaflet) maktaduai 12 thawn lut tura a inpeih thu Korean Central News Agency (KCNA) chuan a tarlang a ni.