Trump-a'n hmai a tuam ve ta
US president Donald Trump chuan kar liam ta Inrinnia sipai hospital a tlawh ṭumin hmai tuamna a vuah a, hei hi an rama coronavirus hri a leng hnuah mipui hmuhah hmaituamna a vuah ve ṭum khatna a ni.
President Trump hian Bethesda, Maryland-a Walter Reed National Military Medical Center-ah kalin, he hmuna sipai hliam tuar awmte leh, hri leng do hna thawktu medical worker-te a tlawh a ni. April thla khan US Centers for Disease Control (CDC) chuan Covid-19 hri laka US mipuite an him zawk nan leh hri an inkaidarh loh nan tiin mipuite chu puipunaa an kal chuan hmaituamna vuah turin a hriattir a ni. Trump chuan hemi chungchang hi chhang letin hmai a tuam dawn loh thu a lo sawi tawh a, hmaituamna chu a dodal a ni lo a, mahse in test reng tho chuan vuah kher a ṭul lo nia a ngaih thu a sawi.
Inrinnia damdawi-in a chhuahsan dawna thuthar thehdarhtute hmaah Trump chuan, "Damdawi-ina hmaituamna vuah hi a ṭha ka ti a, hmaituam hi ka sawisel hranpa a ni lo a, mahse vuah a ṭulna hmun leh hun a awm a ni," tiin a la sawi zui tho a ni. Trump chuan May thlaa Michigan-a Ford factory a tlawh ṭum khan hmai tuamna a vuah thu a sawi a, mahse chanchinbu mite chu a hmai tuamna vuah lai hi a hmuh tir duh lo mai a ni, tiin a sawi bawk. US-a Covid-19 hri kai an la pun belh zel a, Inrinni liam ta khan hri kai thar tam ber ni a thleng leh a darkar 24 chhungin mi 66,528-in an kai a ni. US-a Covid-19 hri kai hmuh tawh hi mi 33,55,781 an tling tawh a, heng zinga enkawl dam hi mi 14,90,542 niin, he hri vanga thi hi mi 1,37,403 an awm tawh bawk a ni.