Ukraine-Russia inbeihna-in ni 100 tling ; Russia kutah Ukraine ram 20% chuang awm tawh

Russia-Ukraine inbeihna chu nimin kha a ni 100-na a ni a, Russia chuan Ukraine khawchhak lam, Donbas lak tumin ṭan an la khawh mek a ni.

Ukraine chuan Russia-in an territory panga an lak tawh thu a puang.

Kyiv khawpui aṭanga beidawnga an tawlh kir hnuah, Russia sipaite hian Ukraine khawchhak lam lak ngei tumin ṭan an la leh mek a ni. Lo rin lawk ang aiin ram la chak lo mah se, Russia sipaite hian hma an sawn zel a, Ukraine ram 20% chu Russia kutah a awm tawh tih Ukraine president Volodymyr Zelenskyy chuan a sawi.

February 24-a Russia-in Ukraine a run aṭang khan mi sang tel thah ni tawhin, mi maktaduai tel chu himna zawngin an tlanchhe tawh bawk. Indona hmunah Ukraine sipaite chu nitin 100 chuang an thi ziah niin President Zelenskyy chuan a sawi bawk.

Lugansk biala industrial hub, Severodonetsk-ah Russia leh Ukraine sipaite an inbei mek a, he khawpui 80% chu Russia-in an thunun tawh a, mahse Ukraine sipaite hian theihtawpin dan chah tumin an la bei ve mek a ni. Lugansk regional governor Sergiy Gaiday chuan Ukraine sipaite chuan a tawp thlengin an bei dawn tih a sawi. Severodonetsk-a khawvel chemical plant lian ber zinga mi, Azot factory chu Russia sipaite hian an bitum mek a ni.

United States kaihhruaina hnuaiah khawthlang ram te chuan Ukraine tan hian ralthuam leh sipai hmanraw dangte an thawn a. Kyiv-a US ambassador thar Bridget Brink chuan Russia beihna lakah Ukraine chu an ṭanpui zel dawn tih a sawi.

Tunkar tir khan US chuan Ukraine tan advanced Himar multiple rocket launch system tam zawk an thawnluh tur thu a puang. Mobile unit-te hian km 80-a hlaa target a kapfuh thei a ni. US hian Ukraine ṭanpuina tur, USD mtd 700 hu a pek tur zingah air-surveillance radar, ammunition, helicopter leh vehicle-te pawh an tel.

Russia sorkar thupuangtu Dmitry Peskov chuan US chu buaina tipunlun zawnga hma laah a puh.

Ukraine tan ralthuam an thawn bakah hian khawthlang ramte chuan Russia sum hmuhna hnar pawimawh tak pakhat chu tihtawp an tum bawk. EU ramte chuan kumin kumtawpah chuan Russia aṭanga oil an lakluh chu 90% a tihtlem an tum a ni.