Queen Elizabeth II kum 70 lal champha an lawm

Britain Lal, Queen Elizabeth II-i'n lalṭhuthleng a luah kum 70-na, Platinum Jubilee celebration chu Ningani aṭang khan lawm ṭan a ni.

Kum 96 mi ni tawh, Queen Elizabeth II hi British chanchina lal dinhmun chelh rei ber niin, February 6 khan a lal kum 70-na record duhawm tak hi a lo siam tawh a ni. Mahse United Kingdom, Realms leh Commonwealth-te chuan June 2, Ningani aṭang khan an lawmsak a, June 5 thleng a awh ang.

Kum 73 an inneih hnuah nikum April thla khan Lalnu hi a pasal Prince Philip chuan kum 99 mi niin a thihsan a ni.

Britain lal ni rei thei ber
Queen Elizabeth hian kum 70 leh thla li dawn lalṭhuthleng luah tawhin, British chanchinah lal ni rei thei ber a ni. A hmaa he dinhmun lo chelh rei ber chu Queen Victoria niin, kum 63, thla sarih leh ni hnih chhung a lal a ni.

Kum 1643-1715 inkara France lal Louis XIV (kum 72) leh kum 70 leh thla li chhung thuneihna lo chang tawh, Thailand lal king Bhumibol Adulyadej kum 70 leh thla li chhung lalte chauh chu Elizabeth-i hian a tluk lo a ni.

Kum 96 mi, Elizabeth hi ram lal leh state hotu lu ber zinga upa ber a ni mek bawk.

Ram 100 chuang tlawh
Lalnu hian kum 1952-a thuneihna a chan aṭangin ram 100 chuang a tlawh tawh a, Commonwealth ramah vawi 150 chuang a zin tawh.

The Daily Telegraph chhutdanin, lalnu hian khawvel chu vawi 42 vel helchhuak hman angin a chhut a, kum 2019 khan kum 89 mi niin hemi hnu hian ram pawnah a zinchhuak tawh lo. Canada ram chu vawi 22 tlawh hmanin, a tlawh ngun ber ram a ni a, Europe ram zingah a tlawh ngun ber, France-ah vawi 13 a zin hman bawk.

Politics leh sakhaw lamah
Lalnu Elizabeth-i hian Prime Minister 14 a hrawn tawh. PM a hrawn hmasa ber chu Winston Churchill (1952-1955) a ni. Buckingham Palace-ah kartin deuhthaw PM-te hi private meeting a neihpui ṭhin.

Sakhaw lamah Lalnu hi Church of England-ah supreme governor a ni a, he dinhmun hi kum zabi 16-naa Henry VIII hunlai aṭangin an lo chelh tawh a ni. Pope pali - John XXIII (1961), John Paul II (1980, 1982 and 2000), Benedict XVI (2010) leh Francis I (2014)-te a lo hmu tawh bawk.