Singapore inthlanah rorellai party in hnehna chang

Singapore prime minister Lee Hsien Loong kaihhruai, People's Action Party (PAP) chuan Zirtawpni liam taa an ram inthlanpui neihah hnehna a chang. 

PAP hian Parliament seat 93-a seat 83-ah hnehna a chang a, eptu pawl Workers' Party chuan seat 10 a la ve bawk. Singapore indan aṭangin PAP hian thuneihna an la chelh chhunzawm a ni. Tun ṭum inthlanah hian hnehna chang leh mah se, kum 2015 inthlanpui aiin seat an lak zat hi a tlahniam thung. 

Kum 2015 inthlanah khan seat 93% leh vote tla aṭanga 71% an hmu pha a, mahse kuminah erawh chuan seat awm zat aṭanga 89% leh vote tla aṭanga 61% chauh an hmuh pha a ni. Seat 10 latu, Workers' Party hi inthlanpuia an chet ṭhat ber ṭum a ni thung. Kum 2015-ah khan Workers' Party hian seat ruk chiah a la pha a ni. 

PAP in hnehna an chan leh tak avangin PM Lee Hsieng Loong chuan PM hna hi a chelh chhunzawm leh thei dawn a ni. Lee hian kum 2004 aṭang khan PM dinhmun hi a chelh tawh a ni.