Turkey-in na taka Netherlands chhan let a tum

Netherlands-in Turkey minister pahnihte an rama campaign a khapsak avangin, Turkey sorkar chuan na taka chhan let a tum tih a sawi.

Turkey President Recep Tayyip Erdogan-a’n an ram danpui siamṭhat a tum chung­changa mipui ngaihdan lak turah, minister pahnih Mevlut Cavusoglu leh Fatma Betul Sayan Kaya-te chuan Netherlands-a Turkey mipuite hnenah campaign an tum a ni. Mahse Dutch sorkar chaun minister pahnihte hi Rotterdam-a thusawi tura an kal a remti lo a, Kaya-i chu an ram aṭangin a chhuah tir zui a ni.

Dutch sorkar thiltih dan duh lo hian Pathianni khan an rama Turkey mi awmte chu Rotterdam-a Turkish consulate kawtah an pungkawm a, Turkey ram puanzar-te vain, police-te chu bur leh lung-te’n an tawng a ni. Dutch police-te chuan mipui punkhawmte hnawhdarh nan hian water cannon te an hmang bawk a, pungkhawm zinga eng emaw zat chu kut an thlak bawk nia sawi a ni.

Turkey khawpui, Ankara-a Dutch embassy leh Istanbul-a consulate bulah pawh Turkey mipuiten lungawi lohna an lantir a, building hi lung leh artuiin an vawm a ni.

Minister Cavusoglu chuan Dutch sorkar thiltih danah an lungawi lo hle tih sawiin, ngaihdam dilna ringawt chuan an inkar boruak a siamṭha thei dawn lo tih a sawi. European Union pawh Turkey thlawpturin a phut a, Dutch sorkar chetdan chu European norms palzutna a ni, a ti.

Netherlands Prime Minister Mark Rutte chuan Turkey ram nena boruak ṭha lo an nei chu pawi a tih thu sawiin, an buaina chingfel turin theihtawp a chhuah tur thu a sawi. Dutch sorkar chuan an rama Turkey politician-te’n campaign neih a remtih loh chhan chu security leh dan leh thupek kenkawh thlenga harsatna a thlen palh an venthawn vang niin a sawi.