Mosul-a IS firfiak la awmte nuai chimih vek tum

Iraq sipaiten Islamic State (IS) firfiakte kut aṭanga an ram khawpui pawimawh, Mosul laklet tuma beihpui an thlak mekah hma an sawn zel a, khawpui chhungaṭang hian firfiak tamtak an tlanchhe tawh.

Security force-te hian khawpui chhak lam bial chu an la let tawh a, khawthlang lam bial lak tumin an la bei mek a ni. Iraq sipaite hian US kaihhruai ṭangrual ramten an pui bawk a ni.

US official, Brett McGurk chuan khawpui chhunga firfiak la chambangte chu nuai chimih vek an ni dawn tih a sawi a, Iraq sipaite chuan tlanchhuahna kawngte pawh an dang vek tawh a ni, a ti.

IS firfiakte hian kum 2014 khan Mosul khua hi an la a, mahse nikum kumtawp lam aṭang khan Iraq sipaite hian khawpui laklet tum hian beihpui an thlak a ni. Hun eng emaw chen beihpui thlak hi an chawlhsan lailawk hnuah, March 5 aṭang khan an bei ṭan leh a, khawpui khaw­chhak lam bial an thunun tawh bakah, khawthlang lam biala sorkar hmun pawimawh ṭhenkhat pawh an la let tawh bawk.

Iraq Counter-Terrrorism Service-a Staff Major General Maan al-Saadi chuan Iraq sorkar hnuaiah Mosul khawthlang lam bial hmun thuma ṭhena hmun khat aia tam zawk a awm tawh niin a sawi.

Mosul khawpui chhunga IS thununa bial chhungah hian ci­vil mi 600,000 vel an la tangkhang mek nia hriat a ni. Iraq sipaite hian khawpui bulah hian a ruala mi tam tak phumna thlan lian tak an hmuchhuak bawk. He thlanah hian IS-te Mosul khua an lak hnua civil mi an tihhlum mi tam tak phum an ni.