Philippines sorkar leh helten inbiakna chhunzawm dawn

Philippines sorkar leh Moaist helte chuan inremna kawng zawnga inbiakna an neih chu thla thar khian chhunzawm leh an tum.

Pawl pahnih aiawhte hian inbiakna an neih hnuah, helpawl Communist Party of the Philippines-New People’s Army-National Democratic Front-te’n an rama pawikhawihna an thlen chhunzawm reng avang leh, helhoin sipai an ambush avang­in Philippines President Rodrigo Duterte thinrim chuan February thla khan inbiakna hi a lo titawp lailawk tawh a ni. Helho chuan security force an beihte titawp a, mines leh plantation aṭanga tihluihna hmanga sum an laksak ṭhinte tihtawp an remtih chauhin inbiakna hi chhunzawm a ni ang tih a sawi.

Mahse sorkar leh helho aiawh ten inremna an siam leh theih tak vangin April thlaa inkahhai puan dan tur ngaihtuaha inbiakna hi chhunzawm a ni leh dawn niin Duterte-a peace adviser, Jesus Dureza chuan a sawi. June thlaah meeting vawi hnihna neih tum a ni bawk.