Turkey-Netherlands inkar boruak chhe zel
Turkey minister-te Netherlands rama campaign khapsak an nih avanga ram pahnihte inkar boruak ṭha lo chuan ziaawm lam ala pan thei lo a, Turkey sorkar chuan Dutch sorkar thiltih avanga a chhan letna turte a puang.
Turkey Deputy Prime Minister Numan Kurtulmus chuan, Dutch ambassador chu Turkey khawpuia a kir an phalsak tawh dawn lo tih sawiin, high-level inbiakna an neih pawh tihtawp a nih tur thu a sawi.
Netherlands sorkar thiltih dana lungawi loin Turkey mipuite chuan Germany, Austria, Switzerland leh Netherlands-ahte kawngzawh huaihawt an tum a, mahse thuneitute an dang a ni.
Thawhṭanni khan Netherlands sorkar chuan ram mipuite tana hriattirna tichhuakin, Turkey nen an inkar boruak ṭha lo avangin Turkey rama Ducth mi awmte chu fimkhur turin a chah.
Dutch Prime Minister Mart Rutte chuan security lam venthawn thilah Turkey miten rally neih an tum chu an remti lo tih a sawi. Rally neih tum an dan avang hian Turkey President Recep Tayyip Erdogan chuan Netherlands leh Germany-te chu na takin a sawisel a, Nazi kalphung zawmah a puh. Germany ramah hian Turkish origin maktaduai thum chuang an awm a, an zinga mi maktaduai 1.4 chuan Turkey inthlanah vote an thlak thei a ni. Germany leh Austria pawhin rally huaihawt hian buaina a chawk chhuak thei a ni tiin an remti lo tih an sawi a ni.