NKorea palai-in US leh SKorea dem

United Nations-a North Korea ambassador Kim In Ryong chuan, Malaysia rama XV nerve agent hmanga North Korea ram hotu, Kim Jong-un unaupa thah a nih chungchangah US leh South Korea chu a dem thu a sawi.

Kim In Ryong chuan he tualthahna thleng hi US leh SKorea-te’n North Korea hmel tihhem an duh vang leh, an social system-te tihchhiat an tumna avanga thleng niin a sawi.

Malaysia thuneitute chuan February 13 khan Kim Jong-un-a unaupa, Kim Jong Nam chu Kuala Lumpur International Airport-ah mi pahnihin tur hlauhawm tak, XV nerve agent tatin an tihlum niin an sawi. Kim Jong Nam hi NKorea sorkar rorel dan sawisel fotu a nih avangin he tualthahna thlengah hian NKorea sorkar chu a inrawlh niin a puh a, mahse he puhna hi NKorea chuan a hnawl thung.

Kuala Lumpur-a thah hian Kim Choi tih hming passport hmang mah se, Malaysia thuneitute chuan Kim Jong Nam a nih thu an sawi a, mahse North Korea official-te chuan Kim Jong Nam a ni ngei em tih an la sawichiang lo.