Donald Trump-a tax pekna document putru

US President Donald Trump chuan chhiah a pek zat puangzar duh lo a, tax thuneituten an enfiah vek tih a sawi hnuah, a chhiah pekna document ṭhenkhat a putru.

Tax document ṭhenkhat putru aṭang hian kum 2005 khan Donald Trump hian chhiah dollar maktaduai 38 a pe a, hemi kuma a sum lakluh chu dollar maktaduai 150 chuang a ni tih hriat a ni. Chhiah a pekna document, phek hnih hi US TV network MSBNC chuan a tichhuak a, mahse a sum lakluhna te chu a tarlang tel lo.

White House chuan chhiah pekna puanzar hi dan kalh a ni thu a sawi.

Donald Trump hian president campaign lai khan an lo tih ṭhin dan ang zawm loin, a chhiah pek zat hi a tarlang duh lo a ni. Trump chuan a chhiah pek zatchu tax thuneitute an endik a, a ukil-te pawhin puangzar kher lo tura an tih thu a sawi. Hetih lai hian sawiseltu lam chuan Trump hian thil zep ṭhen a neih avangin a chhiah pek zat hi a puangzar duh lo niin an puh thung.

Document putru-a a lan danin, Trump hian federal income tax-ah dollar maktaduai 5.3 a pe a, a bak dollar maktaduai 31 chu alternative minimum tax (AMT)-ah a pe a ni. ATM hi kum 50 dawn liamtaa mi hausa zualten chhiah pek an awlruk leh tihtlem venna tura siam a ni a, Trump chuan hei hi tihbo a duh thu a lo sawi awh a ni.

Trump-an dollar mtd 150 chuang a lakluh aṭanga chhiah, dollar mtd 38 a pek hi American mi nawlpuiten chhiah an pek zat 24% aiin a sang a, mahse mi hausa, kum khata dollar maktaduai khat chuang lalut ten an pek tur 27.4% aiin a hniam thung.