SKorea prosecutor-te’n President hlui thu zawhfiah dawn

South Korea prosecutor-te chuan president aṭanga ban tak, Park Geun-hyeo chu nimn khan hriattirna pein, kar lehah thu zawhfiah tura prosecution office-a inlan turin an hriattir.

Park-i hi March 21, zing dar 9.30-ah prosecution office-a inlan turin hriattir a ni a, Park-i legal team pawhin prosecutor-te hi ṭha taka an thawhpui tur thu an sawi.

South Korea president chenna, Blue House a chhuahsan hnuah Park-i hi Seoul chhim lam district-a a inah a khawsa mek a ni. Prosecutor-te chuan Park-i hi thamna sum laa puh, a ṭhianṭha tak Choi Soon-sil thurualpuiah an puh bakah, a thuneihna dik lo taka hmangah an puh bawk a ni.

South Korea home affairs ministry chuan an ram president thar thlan hun atan May 9 ruat a nih thu nimin khan a sawi. Park-i hi March 10 khan president a nihna aṭangin ban a ni a, an ram danpuiah chuan president ban a nih aṭanga ni 60 chhung ngeiin president thar thlanna hun buatsaih tur a ni, a ti.

President thlanna chuh tumte tan public office an chelh mek aṭangin an inhnuhdawh a ngai dawn, hemi atan hian April 6 thleng hun an nei thei dawn a ni. President ban a nih hnuah acting president atana dah, Prime Minister Hwang Kyo-ahn chuan cabinet meeting-ah president chuh atum loh thu a lo sawi tawh a ni.