US judge-in President Trump-a thupek thar dang
US President Donald Trump-a’n an rama lut thei tur chin khuahkhirhna, ‘travel ban’ a siam thar chu nizan zanlai aṭanga hman ṭan tura tih ni mah se, Hawaii state-a federal judge chuan hman a nih hmain a dan sak.
President Trump-a’n travel ban a siam thar hi Muslim tamna ram paruk aṭanga ni 19 chhunga an rama luh khapna bakah, ni 120 chhung raltlan reng reng lakluh khapna tur a ni. Trump chuan he thupek siam a nih chhan chu US-a firfiak lut turte venna tur niin a sawi a, mahse sawiseltu lam chuan inthliarhranna nasa tak niin an sawi thung.
Trump hian January khan khuahkhirhna thupek hi a lo tichhuak tawh a, hemi ṭum hian Muslim ram pasarih a tarlang a, mahse he thupek pawh hi federal judge-te’n an lo dan sak tawh bawk a ni.
US District Judge Derrick Watson chuan travel ban hi hmang lo turin thupek a tichhuak a, he thupek hian Muslim mite bakah, khualzin leh ramdang mi zirlaite thlengin a nghawng dawn a ni, a ti. US-a luh tumte khuahkhirhna dan siam thar hi Hawaii bakah state dangte pawhin lo dan an tum thu an sawi. Ukil-te chuan he khapna siam hi ram inthliarhranna a ni tiin, hei hi US danpui palzutna a ni, a tibawk.
Hawaii bakah Maryland-ah pawh President thupek tihchhuah hi Muslim-te enhranna a ni tiin, dang tura ngenna chu ngaihtuah mek a ni bawk. Maryland-ah hian Muslim ram mite luh khap chungchang bakah, US sorkarin kumina raltlan lakluh tur 110,000 aṭanga 50,000-a titlem tumna pawh an duh loh thu thlen a ni bawk.
Hetih lai hian President Trump chuan Nashville-a rally a neihah, a thupek chu a taka hman ngei a nih theih nan a bei zui zel dawn tih a sawi. Judge-in a thupek a lo dansak chu na taka sawiselin, a ṭul a nih chuan US Supreme Court hial pawh thlen a huam thu a sawi.