Philippine president ban turin phut

Philippine eptu member chuan Congress-ah complaint thehlutin President Rodrigo Duterte-a chu mipui rinna tichhia leh a thuneihna dik lo taka hmangah puhin, president a nihna aṭanga paihthla turin a phut.

Lower House member Gary Alejano chuan President Duterte pawikhawihna thlen chu a nasa hle tih sawiin, paihthlakna khawp a tling a ni, a ti. Davao city mayor a nih laia pawikhawihtute tihlumtu tur ‘death squad’ a siam te, a thuneihna hmanga ruihhlo zawrh­na inhnamhnawih tihlum chung­changte zepah a puh bawk.

Duterte chuan an puhna chu thu dik lo a nih thu a sawi a, a thupuangtu pawhin Alejano chuan mipuite rilruah thu dik lo tuh a tum niin a sawi. Mahse Alejano chuan a tum ber chu Philippine mipuiten an president laka an lungawi lohnate an sawichhuah ngamna tura ti a nih thu a sawi a, mi tam takin a complaint thehluh chu an thlawp dawn niin a sawi.

Nikuma Philippine President atana lakluh a nih hnuah Duterte hian ruihhlo do beihpui a thlak nghal a, ruihhlo zuar leh hmang ṭhin nia puh mi 8,000 chuang tihhlum an ni tawh a, mi tam tak man an ni bawk.