Ukraine khawpui Kyiv-ah bomb puak leh ; Khawchhak lamah inbei chhunzawm zel

Ukraine khawpui, Kyiv-ah nimin zing khan bomb eng emaw zat a puak leh niin Kyiv mayor Vitali Klitschko chuan a sawi.

Vitali Klitschko chuan Kyiv-a Darnytskyi leh Dniprovskyi district-ahte bomb puak thawm hi hriat a ni leh tih nimin zing khan telegram messaging app-ah a sawi. Bomb puakah hian thi an awm lo a, mi pakhat erawhin hliam tuarin damdawi-in panpui a ni tih a sawi bawk. Hetih lai hian official dang chuan Russia sipaite hian railway network chu an rawn bitum ber nia a lan thu a sawi.

Russia sipaiten Kyiv khawpui an lak theih loh avanga khawchhak lam an bitum tak avangin Kyiv khawpui boruak pawh hi hun eng emaw chen chu a dai hman tawh hle a ni.

Hetih lai hian Ukraine khawchhak lamah Russia leh Ukraine sipaite an la inbei chhunzawm zel a, Luhanks bial governor Serhiy Gaidai chuan nimin khan Ukraine sipaite'n an biala khawpui pawimawh, Sievierodonetsk biala Russia-te kuta awm ṭhenkhat chu an lak let sak tih a sawi.

Gaidai chuan, "Dinhmun harsa takah kan awm mek a ni. Russia hian khawpui 70% vel an la hman a, mahse ni hnih chhung khan an tawlh kir leh a tunah hian khawpui hi a zahve ve ve angin Ukraine leh Russia hian a thunun a ni," a ti. Hetih lai hian Russia lam chuan Sievierodonetsk khawpuiah an sipaite chuan hma an sawn zel tih a sawi thung a, khawpui chhak lam bial chu an thunun vek tawh niin a sawi.