North Korea-in ballistic missile kap chhuak leh

North Korea chuan nimin khan tuipui kam lamah ballistic missile an kapchhuak leh niin South Korea military chuan a puang.

South Korea leh US-te'n kum li hnua joint drill hmasa ber an neih leh hnu lawkah NKorea hian missile hi a lo enchhin ve leh nghal a ni.

Ralthuam a siam avanga economy lama hrekna tawk mah se, NKorea hian kuminah weapon programme lamah hma a la chho nasa hle.

SKorea joint chiefs of staff chuan, "NKorea-in tuipui kam chhak lamah eng ber nge tih hriat loh ballistic missile a kapchhuak leh a ni," a ti. Japanese Coastguard chuan ballistic missile ni theia rin chu North Korea aṭanga kahchhuah a ni tiin a sawi ve bawk.

South Korea leh United States-in ni thum awh military drill an neih chu an zo fel a, he drill-ah hian ton 1,00,000-a rit nuclear-powered aircraft carrier, USS Ronald Reagan pawh hman a ni. Hei hi kum 2019, November hnua drill an neihah aircraft carrier an hman tel ṭum khatna a ni.

NKorea chuan SKorea leh US-in joint military exercise an neih ṭhin hi a dodal reng a, an ram an runna tura an zirlawkna niin a puh.

Thla hmasa khan NKorea missile pathum a lo enchhin tawh bawk a, heng zingah hian intercontinental ballistic missile lianber Hwasong-17 pawh a tel niin an sawi. US president Joe Biden-a'n South Korea a chhuahsan hnu lawkah missile hi an kapchhuak zui a ni.