Trump-a’n budget blueprint tlangzarh

US President Donald Trump chuan a kaihhruai sorkar hnuaia budget blueprint hmasa ber a tlangzarh a, budget tharah hian sorkar department leh agency hrang hrangte sum hmanral tithlem a, defence tana sum tam zawk hman tum a ni.

Budget blueprint-ah hian inthlan dawna Trump-a thutiam hrang hrangte tihhlawtlinna turte pawh telh a ni.

‘America First’ Budget tia sawiah hian, sorkar department leh agency-te sum hman zat tihtlemna tur program eng emaw zat titawpna turte a tel a, hei bakah hian fiscal year 2018, kumi October 1 aṭanga inṭan turah sorkar hnathawk zat tihtlemna tur pawh a tel bawk.

Budget-ah hian sorkar kum thara ramdangte chhawmdawlna tura sum pek ṭhin chu kum kallai mek aṭangin 28% ah tihhniam rawt a ni. State Department, US Agency for International Development leh Treasury Department International Programm hnuaia foreign aid program atana sum dahte tihtlem a ni ang.

Commerce, agriculture, education, energy, health leh human service-ah pawh sum tihtlem vek a ni dawn a, Environmental Protection Agency tana sum dah chu dollar tluklehdingawn 2.6 in a tlem tawh dawn a, 2017 aia a tlemna tur hi 31.4% a tling.

Hetih lai hian US sipaite leh border security lam thuam chak a nih theih nan Defence Department tana sum dah chu 10% a tihpun a, Homeland Security Department sum chu 6.8% a tihpun rawt a ni bawk.

Budget rawtna siamte hi Congress-ah pharh a ni dawn a, House Democratic leader Nancy Pelosi chuan he rawtna hi a dodal tur thu a sawi. Pelosi chuan, “He budget tharin hnathar siamna tur te, zirna, clean energy leh medical research investment rawk a, defence lama sum tam tham tak vawmluh hi kan ram chaklohna tur zawk a ni”, a ti. Republican member tam tak pawhin State Department sum tihtlem tum chu an dodal bawk.