Syria-a mosque beihnaah mi 42 thi

Syria hmarlama firfiakte awp khuaa mosque beihnaah mi 42 an thi a, an zinga a tam zawk chu civil mi an ni tih monitoring group, Syrian Observatory for Human Rights chuan a sawi.

Russia leh Syria sipaite chuan firfiakte lakah beihpui an thlak a, US indo thlawhtheihna pawh firfiakte hmun bei tura tirh an ni bawk. US chuan thlawhtheihna hmanga beihpui an thlak thu leh, al-Qaida firfiak eng emaw zat an thah thu a sawi a, mosque erawh an kap fuh tel lo tih a sawi thung.

US Central Command chuan a tirah Idlib province-ah beihpui thlak a ni tih a sawi a, mahse a hnuah a hmun tak hi a chiang lo niin a sawi leh. Thupuangtu Col John J Thomas chuan, “Mosque kan bei lo a firfiakte meeting neihna in kan beih a ni. Chu chu mosque aṭanga feet 50 vela hlaa awm a ni”, a ti. 

Hetih lai hian UK-a hmunpui nei, Syrian Observatory chu tualchhung mite hnen aṭanga thu an dawn danin, beihpui thlaknaah hian al-Jineh mosque kahfuh a nih thu a sawi a, beih a nih lai hian mosque-ah hian tlailam ṭawngṭai hun hmanga kal mi eng emaw zat an awm a ni, a ti.